Elm və Təhsil Nazirliyinin İqtisadiyyat İnstitutunun baş elmi işçisi, AMEA-nın müxbir üzvü, i.e.d., professor Əli Nuriyevin “Azərbaycan iqtisadiyyatının inkişafı və regional strukturunun təkmilləşməsi istiqamətləri” kitabı çapdan çıxıb.
Azərbaycan Respublikasının Prezidenti yanında Dövlət İdarəçilik Akademiyasının Elmi Şurasının qərarı ilə nəşr olunan kitabın elmi redaktoru, professor Tərbiz Əliyev, rəyçiləri professorlar Xatirə Hüseyinova, Fərhad Rəhmanov və Sabir Cümşüdovdur.
Kitabda iqtisadiyyatın regional strukturunun mahiyyəti açılır, göstəriciləri sistemləşdirilir, son bir əsr ərzində Azərbaycan iqtisadiyyatının inkişafı və regional strukturunda baş verən dəyişikliklərin xülasəsi verilir. Müasir dövrdə regionların istehsal potensialından səmərəli istifadənin zəruriliyi əsaslandırılır. İnzibati-ərazi bölgüsünün və ərazi idarəetmənin təkmilləşməsi bu problemin həllinin başlıca vasitəsi kimi irəli sürülür. İqtisadi rayonlaşdırmaya və inzibati-ərazi bölgüsünə münasibətdə mövqe fərqlərinin yaranması səbəbləri və onların aradan qaldırılması yolları göstərilmiş, regional siyasətin təkmilləşməsi istiqamətində təklif xarakterli mülahizələr irəli sürülmüşdür (economics.org.az).
