Elm və Təhsil Nazirliyinin İqtisadiyyat İnstitutunun Xarici iqtisadi fəaliyyətin tənzimlənməsinin aparıcı elmi işçi, i.f.d., dosent Dağbəyi Allahverdiyevin müəllifliyi ilə nəşr olunmuş "Dünya iqtisadiyyatı: iqtisadi mənafelər, mövcud reallıqlar və perspektivlər" kitabında Azərbaycanın müasir dünya iqtisadi siyasətində mövqeyinin gücləndirilməsi və bu istiqamətdə ölkənin iqtisadi təhlükəsizliyinin təmini məsələləri təhlil edilmişdir (Bakı, «Elm və təhsil” nəşriyyatı, 2022, 352 səh.).
Müasir dünya iqtisadiyyatı, dövlətlərin iqtisadi əməkdaşlığının səmərəliliyi, xarakteri və real mənzərəsi mövzunun elmi cəhətdən tədqiq edilməsini zəruri etmişdir. Belə ki, davamlı iqtisadi inkişafın təmin olunmasında makroiqtisadi göstəricilərin əhatəli təhlili və iqtisadi artımın sürətləndirilməsi, beynəlxalq iqtisadi münasibətlərin inkişaf səviyyəsinin artırılmasını şərtləndirir. Bu səbəbdən də kitabda yeni dünya iqtisadi siyasətində xarici dövlətərlə əlaqələrin yeni formalarının yaradılması, iqtisadi diplomatik münasibətlərin inkişafı nəzərdən keçirilmişdir. Siyasi-iqtisadi əlaqələr və əməkdaşlıq, ölkələrin ticarət, sənaye, informasiya, maliyyə, qlobal iqtisadiyyat, bank işləri, insan rifahının təminatı, sağlam insan potensialı və sosial-iqtisadi inkişafın müasir vəziyyəti və perspektivləri araşdırılmışdır. Eyni zamanda, Azərbaycan geostrateji cəhətdən tərəfdaş olduğu ölkələrlə əməkdaşlığının yeni perspektiv istiqamətləri və ölkəmizin makroiqtisadi sabitliyi, neft və qeyri-neft sektorunun inkişafı, ölkədə maliyyə sabitliyinin təmin edilməsi istiqamətində dövlətin tənzimləyici iqtisadi siyasəti elmi-nəzəri cəhətdən tədqiq olunmuşdur.
