Elm və Təhsil Nazirliyinin İqtisadiyyat İnstitutunda elmi tədqiqatların maliyyələşdirilməsinin yeni mexanizmi ilə bağli pilot layihənin nəticələrinin müzakirəsinə həsr olunmuş tədbir keçirilib. Tədbirdə Elm və Təhsil Nazirliyi yanında Elm və Ali Təhsil üzrə Dövlət Agentliyinin direktor müavini, AMEA-nın müxbir üzvü, texnika elmləri doktoru, professor Əminağa Sadıqov da iştirak edib.
Tədbiri giriş sözü ilə açan ETN İqtisadiyyat İnstitutunun baş direktoru, i.e.d., professor Nazim Müzəffərli 2021-ci ildə Nazirlər Kabinetinin qərarı təsdiq olunmuş qaydalar əsasında İnstitutun maliyyələşdirilmənin yeni mexanizmi barədə məlumat verib. Bildirib ki, həmin qərara əsasən elmi tədqiqatların maliyyələşdirilməsinin yeni mexanizminin tətbiqi ilə bağlı İqtisadiyyat İnstitutunda 2021-2024-cü illərdə pilot layihə həyata keçirilir. Layihə bu ilin sonunda bitir. Qaydalara əsasən İnstitutun baza maliyyələşdirilməsi və elmi tədqiqatların sifarişlər əsasında maliyyələşdirilməsi mexanizmləri nəzərdə tutulub, pilot layihə kimi uğurla tədbiq olunub, yeni maliyyə imkanları yaranıb. Arzu olunandır ki, pilot layihə növbəti 5 ildə də davam etdirilsin və digər elmi İnstitutlarda da tədbiqinə başlanılsın.
Sonra ETN İqtisadiyyat İnstitutunun elmi katibi, i.e.d., dosent Leyli Allahverdiyeva İqtisadiyyat İnstitutunda elmin maliyyələşdirilməsinin yeni mexanizmi ilə bağli pilot layihənin nəticələri haqqında təqdimatla çıxış edib. Məruzəçi İqtisadiyyat İnstitutunun fəaliyyətinin pilot layihə əsasında maliyyələşdirilməsinin yeni mexanizmi, maliyyələşdirmə prinsipləri və meyarları, elmi tədqiqatların sifarişlər əsasında maliyyələşdirilməsi, əlavə maliyyənin xərclənməsi istiqamətləri, əməkdaşların əməkhaqlarına əlavələr edilməsi imkanlarının yaranması, dövlət qurumları ilə birgə həyata keçirilmiş tədbirlər və layihələr barəsində geniş məlumat verib.
Sonra İqtisadiyyat İnstitutunda elmin maliyyələşdirilməsinin yeni mexanizmi ilə bağli pilot layihənin nəticələri ətrafında geniş müzakirələr aparılıb. Çıxış edənlər – professorlar Tofiq Hüseynov, Tərbiz Əliyev, Fuad Qənbərov, dosentlər Rəsmiyyə Abdullayeva, Yaşar Məmmədov, Azər Səfərov İqtisadiyyat İnstitutunda layihənin uğurla həyata keçirildiyini, müsbət nəticələrini nəzərə almaqla növbəti illərdə də davam etdirilməsinin zəruriliyini vurğulayıblar. Habelə iqtisadçı alimlər elmin maliyyələşdirilməsinə müasir çağırışlara uyğun olaraq yeni yanaşmalar tələb olunduğunu qeyd edərək, onun təkmilləşdirilməsi ilə bağlı təkliflərlə çıxış ediblər.
Elm və Ali Təhsil üzrə Dövlət Agentliyinin direktor müavini, professor Əminağa Sadıqov İqtisadiyyat İnstitutunda elmin maliyyələşdirilməsinin yeni mexanizmi ilə bağli pilot layihə ideyasını, layihə çərçivəsində görülmüş işləri, əsas nəticələri yüksək qiymətləndirib. Bildirib ki, müasir zamanın tələblərinə uyğun olaraq tədricən elmin maliyyələşdirilməsinin təkmilləşdirilməsi zəruridir. Elmi müəssisələrin fəaliyyətinə sərbəstlik verilməklə yanaşı onların maliyyələşdirilməsi və xərcləri dəqiq, şəffaf olmalıdır. Maliyyələşdirmənin əsas meyarları və prinsipləri, bu sahədəki problemləri də qeyd edən direktor müavini elmi tədqiqatların ictimai əhəmiyyətini, elmin populyarlaşdırılmasının zəruriliyini vurğulayıb, təklif və tövsiyələrini səsləndirib.
Tədbirin nəticəsi olaraq İqtisadiyyat İnstitutunda elmin maliyyələşdirilməsi ilə bağlı pilot layihənin həyata keçirilməsinin növbəti 5 ildə də davam etdirilməsi məqsədəuyğun hesab olunub (economics.org.az).
