Elm və Təhsil Nazirliyinin İqtisadiyyat İnstitutunun aparıcı elmi işçisi, dosent Kamran Abdullayev ABŞ-da nəşr olunan, beynəlxalq reytinqli “Şərqi Avropa və Mərkəzi Asiya Araşdırmaları Jurnalı”nın (Journal of Eastern European and Central Asian Research) beynəlxalq rəyçisidir. İqtisadiyyat sahəsində yüksək beynəlxalq impakt faktora malik “Şərqi Avropa və Mərkəzi Asiya Araşdırmaları Jurnalı” 2014-cü ildən Scopus və Web of Science (WOS) bazasına daxildir.
Jurnalın redaktoru və beynəlxalq redaksiya heyəti üzvləri tərəfindən bütün rəyçilərə 2023-cü ildə onlara təqdim olunan iqtisadi məqalələri ingilis dilində elmi baxımdan düzgün təhlil etmələri, o cümlədən rəylərinin keyfiyyəti və obyektivliyi nəzərə alınmaqla təşəkkür bildirilmişdir. Bununla 
yanaşı, jurnalın rəyçiləri arasında onların fəaliyyət göstərdiyi ölkələr və elmi təşkilatlar üzrə seçim edilərək beynəlxalq reytinq siyahısı tərtib olunmuşdur. Jurnalın 2023-cü ildə bütün dünya üzrə 40-a yaxın ölkədən 200-ə yaxın iqtisadçı rəyçisi var. Elm və Təhsil Nazirliyinin İqtisadiyyat İnstitutunun “Xidmət sferasının iqtisadiyyatı” şöbəsinin aparıcı elmi işçisi, i.f.d., dosent Kamran Abdullayev 2023-cü il üzrə bu reytinq siyahısında (həm ölkə, həm də təmsil etdiyi elmi-tədqiqat müəssisəsi üzrə) birinci pilləyə yüksəlib. Məhz buna görə də 2024-cü ildə onun bu jurnalın beynəlxalq elmi redaksiya heyətinə daxil edilməsi tövsiyə edilmişdir.
Bu münasibətlə əməkdaşımız, dos. Kamran Abdullayevi təbrik edir, elmi fəaliyyətində daha böyük uğurlar arzulayırıq.
Qeyd edək ki, K.Abdullayevin Scopus bazasına daxil olan elmi jurnallarda 5 məqaləsi var, H-indeksi göstəricisi 3-dür (economics.com.az).
