İqtisadiyyat Nazirliyi, Türkiyə Respublikası Ticarət Nazirliyi, Türkiyə Respublikası Prezidentinin Maliyyə ofisinin dəstəyi, İxracın və İnvestisiyaların Təşviqi Agentliyi – AZPROMO və Türkiyə-Azərbaycan İş Adamları və Sənayeçiləri İctimai Birliyinin (TÜİB) birgə təşkilatçılığı ilə Azərbaycan-Türkiyə İnvestisiya Forumu keçirilib. İqtisadiyyat naziri Mikayıl Cabbarov, Türkiyə Prezidentinin Maliyyə İdarəsinin müdiri Göksel Aşan və Türkiyə Respublikasının ticarət naziri Ömər Bolat forumda çıxış ediblər.
Tədbirdə dövlət rəsmiləri ilə yanaşı, hər iki ölkədən energetika, sənaye, tikinti, logistika, qida sənayesi, kənd təsərrüfatı, maliyyə, turizm, əczaçılıq, İKT və digər sahələrdə fəaliyyət göstərən şirkət nümayəndələri iştirak ediblər. Foruma Elm və Təhsil Nazirliyinin İqtisadiyyat İnstitutunun ailmləri də qatılıblar.
Azərbaycan-Türkiyə İnvestisiya Forumunda “Azərbaycan Respublikasında investisiya qoyuluşu imkanları” paneli təşkil edilib, investisiya qoyuluşu imkanları müzakirə olunub. Tədbirdə İqtisadiyyat naziri Mikayıl Cabbarov, Ələt Azad İqtisadi Zonasının səlahiyyətli qurumunun İdarə Heyətinin sədri Valeh Ələsgərov, İqtisadi Zonaların İnkişafı Agentliyinin İdarə heyətinin sədri Elşad Nuriyev, Azərbaycan İnvestisiya Şirkətinin icraçı direktoru Ülvi Mansurov, ETN İqtisadiyyat İnstitutunun baş direktoru Nazim Müzəffərli (İmanov), Türkiyə Prezidentinin Maliyyə İdarəsinin müdir müavini Necip Fazil Kaymak, “Kartaş” MMC-nin direktoru Necmeddin Taşbağ çıxış ediblər. Panel iclas İxracın və İnvestisiyaların Təşviqi Agentliyi – AZPROMO-nun icraçı direktoru Yusif Abdullayevin moderatorluğu ilə keçirilib.
Azərbaycan-Türkiyə İnvestisiya Forumunun Bakıda keçirilməsinin iki qardaş ölkə arasındakı birliyi daha da möhkəmləndirdiyi vurğulanıb. Diqqətə çatdırılıb ki, ölkələrimiz arasında iqtisadiyyatın müxtəlif sahələrində əlaqələrin genişləndirilməsi üçün böyük potensial mövcuddur. İnvestisiya forumu çərçivəsində müzakirə edilən məsələlər və aparılan danışıqlar dost ölkələr arasında iqtisadi-ticarət əlaqələrinin, iş adamları arasında işgüzar tərəfdaşlığın inkişafında əhəmiyyətli olacaq. İqtisadi əməkdaşlığımızın bütün sahələrində müsbət dinamika müşahidə olunur. Dövlət başçılarımız ticarət dövriyyəsinin 15 mlrd. ABŞ dollarına çatdırılmasını hədəf olaraq qarşıya qoyub. Birgə layihələrin uğurla icrası, qarşılıqlı sərmayələrin fəal təşviqi və ticarət dövriyyəsinin davamlı artımı bu məqsədə çatmaq üçün əminlik yaradır.
Tədbirdə işğaldan azad edilmiş ərazilərimizin zəngin resursları və əlverişli investisiya mühiti barədə məlumat verilib, qardaş Türk şirkətlərinin bu ərazilərdə aktiv fəaliyyətinin qürurverici olduğu vurğulanıb. Panel çərçivəsində investisiya mühitimizin təqdim etdiyi səmərəli şərtlər, ölkəmizdə investisiya qoyuluşunun prioritet istiqamətləri, Ələt Azad İqtisadi Zonasında və sənaye zonalarında sahibkarlar üçün yaradılmış imkanlar, xarici investisiyalı müəssisələrin fəaliyyəti, investisiya platformasında dövlət dəstəyi, işğaldan azad edilmiş ərazilərimizdə həyata keçirilən investisiya layihələrində iştirak, prioritet sektorlarda biznes layihələrinin maliyyələşdirilməsi barədə müzakirələr aparılıb.
