Sentyabrın 26-da Milli Məclisdə Rəqabət Məcəlləsinin layihəsi ilə bağlı ictimai dinləmə keçirilib. Tədbirdə Milli Məclisin deputatları, sahibkarlar assosiasiyalarının, ticarət palatalarının, QHT-lərin təmsilçiləri, ekspertlər və mütəxəssislər, o cümlədən Elm və Təhsil Nazirliyinin İqtisadiyyat İnstitutunun icraçı direktoru, professor Müşfiq Atakişiyev, şöbə müdiri, dosent Rəsmiyyə Abdullayeva iştirak ediblər, layihə barədə fikirlərini, qeyd və təkliflərini səsləndiriblər.
Parlamentin İqtisadi siyasət, sənaye və sahibkarlıq komitəsinin sədri Tahir Mirkişili bildirib ki, Rəqabət Məcəlləsinin layihəsi Azərbaycan Prezidentinin qanunvericilik təşəbbüsü ilə Milli Məclisə daxil olub. O, yeni Rəqabət Məcəlləsinin qəbul olunmasının ölkə iqtisadiyyatının inkişafı, biznes mühitinin əlverişliliyinin artırılması, azad sahibkarlığın təşviqi baxımından mühüm əhəmiyyət kəsb etdiyini qeyd edərək, sənədin ölkədə sahibkarların sağlam rəqabət şəraitində fəaliyyətinin hüquqi əsaslarını müəyyən etdiyini vurğulayıb. Diqqətə çatdırılıb ki, sənəd həm də istehlakçıların hüquqlarının müdafiəsini, məhsul və xidmətlərin keyfiyyətinin daha da artırılmasını hədəfləyir.
Sonra iqtisadiyyat nazirinin birinci müavini Elnur Əliyev çıxış edərək, sənədin hazırlanması prosesi, beynəlxalq təcrübə, sənəddəki yeni anlayışlar barədə məlumat verib. Bildirilib ki, sənədin qəbulu ilə iqtisadiyyatda özəl sektorun rolunun artırılması, bazar münasibətlərinin möhkəmləndirilməsi, müasir çağırışlara cavab verən azad, sağlam rəqabət mühitinin yaradılması təmin olunacaq. Həmçinin inhisarçılığa, sövdələşmələrə, o cümlədən digər bazar manipulyasiyalarına qarşı effektiv mübarizə aparılmasına əlverişli imkan yaranacaq.
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli yeni Rəqabət Məcəlləsinin təqdimatını edib. O, Məcəllənin hazırlanmasını zəruri edən amillərdən danışıb. Bildirilib ki, Prezidentin fərman və sərəncamlarında qoyulan tapşırıqlara uyğun olaraq yeni iqtisadi və sosial çağırışlara hazır olmaq, dayanıqlı və rəqabətqabiliyyətli iqtisadi inkişafı təmin etmək, müasir tənzimləmə metodlarını tətbiq etmək üçün Avropa İttifaqının, həmçinin Türkiyənin, Rusiyanın, Qazaxıstanın bu sahədəki təcrübələri araşdırılıb, müvafiq beynəlxalq tövsiyə sənədləri və məhkəmə təcrübəsi öyrənilib.
M.Abbasbəyli qeyd edib ki, Məcəllənin əsas üstünlüklərindən biri bazarın sərhədinin dəqiq müəyyən edilməsidir. Diqqətə çatdırılıb ki, bu Məcəllənin əsas məqsədləri inhisarçılığı, haqsız rəqabəti aradan qaldırmaq, ölkədə rəqabət əsasında dayanıqlı iqtisadi inkişafı təmin etməkdir. Xidmət rəisi sənəddə təsbit olunan rəqabətə dövlət nəzarətinin tənzimlənməsi, dövlətin rəqabətə təsir formaları, məsuliyyət tədbirlərinin tətbiqi və digər alətlər barədə məlumat verib.
Müzakirələr zamanı çıxış edənlər yeni Məcəllənin ölkə iqtisadiyyatının inkişafına, biznes mühitinin əlverişliliyinin artırılmasına böyük təsir göstərəcəyini qeyd ediblər. Onlar Rəqabət Məcəlləsinin tətbiqi zamanı keçid dövrünün və işləmə mexanizminin müəyyən olunmasının, maraqların toqquşmasının və manipulyasiyaların qarşısının alınmasının vacibliyini bildiriblər. Həmçinin sənəddə əks olunan terminoloji yanaşmalar, dövlət nəzarəti orqanının müstəqilliyinin təmini, bazarda hökmran mövqeyin müəyyən olunması, təsərrüfat subyektlərinin davranışlarının qiymətləndirilməsi kimi məsələlərlə bağlı qeydlərini diqqətə çatdırıblar.
Sonda iqtisadiyyat nazirinin birinci müavini Elnur Əliyev, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli dinləmədə qaldırılan məsələlərə aydınlıq gətiriblər.
