AMEA İqtisadiyyat İnstitutunun “Sahibkarlıq və inhisarçılığın tənzimlənməsi problemləri” şöbəsinin müdiri, iqtisad elmləri doktoru, professor Tərbiz Əliyevin rəhbəri olduğu bir qrup elmi əməkdaşın həmmüəllifliyi ilə “Azərbaycanda biznes mühiti – 2020: reallıqlar və perspektivlər ” kitabı çap olunub.
AMEA İqtisadiyyat İnstitutunun Elmi Şurasının qərarı ilə nəşr edilən monoqrafiya “Azərbaycanın sosial-iqtisadi inkişafı və beynəlxalq müqayisəli reytinqlərdə mövqeyinin daha da yaxşılaşdırılması” (elmi rəhbər i.e.d., professor Nazim Müzəffərli (İmanov)) elmi istiqaməti üzrə “Biznes mühiti və sahibkarlığın inkişaf göstəriciləri üzrə müqayisəli reytinqdə Azərbaycanın mövqeyinin daha da yaxşılaşdırılması istiqamətləri”nin araşdırılmasına həsr olunmuşdur.
Kitabın elmi redaktoru, i.e.d., professor Tərbiz Əliyev, rəyçiləri i.e.d., professor Müşfiq Atakişiyev və i.f.d., dosent Allahyar Muradovdur.
Kollektiv monoqrafiyada Dünya Bankının tövsiyə etdiyi metodologiya və “Doing Business” hesabatı əsasında biznes mühiti, sahibkarlığın inkişaf göstəriciləri üzrə ümumi reytinqi və onun ayrı-ayrı indikatorlarının səviyyəsi, eləcə də BMT-nin dayanıqlı inkişaf hesabatında “Ticarət prosedurlarının sadələşdirilməsi” üzrə qlobal tədqiqatlarının nəticələri ölkələr üzrə təhlil edilib qiymətləndirilmişdir. Habelə həmin reytinqdə Azərbaycanın mövqeyində baş verən pozitiv dəyişikliklər izlənilmiş, onun yüksəldilməsi istiqamətində - Azərbaycan hökumətinə, sahibkarlara, qeyri-hökumət təşkilatlarına və Dünya Bankına hədəflənən kompleks xarakterli əməli təklif və tövsiyələr verilmişdir.
Monoqrafiya elmi-tədqiqat institutlarının əməkdaşları, dövlət orqanlarında, ictimai təşkilatlarda çalışan mütəxəssislər, sahibkarlar, ali məktəb müəllimləri və gənc tədqiqatçılar üçün nəzərdə tutulmuşdur (economics.com.az).
Kitabın elektron variantı
“Azərbaycanda biznes mühiti – 2020: reallıqlar və perspektivlər”
