Mayın 25-də ADA Universitetində “Qarşılıqlı yardım” Klubunun təşkilatçılığı ilə “İnklüziv cəmiyyət quruculuğu: çətinliklər və həll yolları” mövzusunda elmi seminar keçirilib.
Seminarda Elm və Təhsil Nazirliyi İqtisadiyyat İnstitutunun “İnklüziv sosial inkişaf” şöbəsinin müdiri, iqtisad elmləri doktoru, professor Rəsmiyyə Abdullayeva “Azərbaycanda inklüziv ali təhsil: problemlər və həllər” mövzusunda məruzə ilə çıxış edib. Məruzədə ölkədə inklüziv ali təhsilin mövcud vəziyyəti, bu sahədə qarşıya çıxan problemlər və onların aradan qaldırılması istiqamətində həyata keçirilə biləcək tədbirlər barədə ətraflı məlumat verilib.
Tədbirdə həmçinin ADA Universitetinin “Qarşılıqlı yardım” Klubunun sədri Gültəkin Salamova inklüzivlik mövzusunda məruzə ilə çıxış edib. Məruzələr iştirakçılar tərəfindən maraqla qarşılanıb.
Çıxışlardan sonra seminar iştirakçılarının sualları cavablandırılıb, inklüziv cəmiyyətin formalaşdırılması, təhsil imkanlarının genişləndirilməsi və sosial inteqrasiya məsələləri ətrafında geniş müzakirələr aparılıb.
Tədbirin sonunda fəal iştirakçılara kitablar hədiyyə olunub, xatirə şəkli çəkdirilib.
Seminar inklüziv cəmiyyət quruculuğu istiqamətində elmi fikir mübadiləsinin aparılması və bu sahədə mövcud problemlərin həlli yollarının müzakirəsi baxımından əhəmiyyətli platforma kimi qiymətləndirilib.
