Martın 2-də Azərbaycan Respublikasının Biznes mühiti və beynəlxalq reytinqlər üzrə Komissiyasının “Əmək bazarı” işçi qrupunun iclası keçirilib.
Onlayn formatda baş tutan toplantıda Dünya Bankı Qrupunun “Business Ready” hesabatının “İşçi qüvvəsi” indikatoru ilə bağlı 2025-ci il üzrə nəticələri müzakirə olunub. İclası giriş sözü ilə işçi qrupunun yeni rəhbəri, əmək və əhalinin sosial müdafiəsi nazirinin müavini Rəşad Mustafayev açıb. Sonra Komissiyanın Katibliyinin rəhbəri, Prezident Administrasiyasının İqtisadi siyasət və sənaye məsələləri şöbəsinin sektor müdiri Vüsal Şıxəliyev çıxış edib.
“Əmək bazarı” işçi qrupunun katibi, Əmək və Əhalinin Sosial Müdafiəsi Nazirliyinin Strateji planlaşdırma və innovasiyalar şöbəsinin müdir müavini Nicat Rəhmanlı Dünya Bankı Qrupunun “Business Ready” hesabatının “İşçi qüvvəsi” indikatoru ilə bağlı 2025-ci il üzrə nəticələrinə dair təqdimatla çıxış edib.
Tədbirə Elm və Təhsil Nazirliyi İqtisadiyyat İnstitutunun “İnklüziv sosial inkişaf” şöbəsinin müdiri, i.e.d., prof. Rəsmiyyə Abdullayeva da qatılıb. Təqdimatdan sonra mövzu ətrafında geniş müzakirələr aparılıb.
