Elm və Təhsil Nazirliyi İqtisadiyyat İnstitutunun “İnnovativ iqtisadiyyat və rəqəmsal transformasiya” şöbəsinin aparıcı elmi işçisi, iqtisad üzrə fəlsəfə doktoru Gülnarə Fətəliyeva 23-27 fevral 2026-cı il tarixlərində Vyana Müştərək İnstitutunda Avstriya hökumətinin maliyyələşdirdiyi “Rəqabətlilik, iqtisadi artım və böhran” mövzusunda təşkil olunmuş kursda iştirak etmişdir.
Bir həftəlik kursda iştirakçılara 2030-cu il Dayanıqlı İnkişaf Gündəliyinin məqsədlərinə çatmaqda irəliləyişlərin qiymətləndirilməsi, Covid-19 pandemiyasının iqtisadi artıma, məşğulluğa və məhsuldarlığa təsirləri, resursların yenidən bölüşdürülməsi yolu ilə məhsuldarlığın artırılması, dəyişən qloballaşma dövründə rəqabət qabiliyyətinin qorunması, dövlətlərin innovasiya və rəqəmsallaşma göstəricilərinin təhlili, rəqabəti stimullaşdırmaq üçün fərqli dünya ölkələrinin siyasət nümunələri və təcrübələri barədə mühazirələr keçilmişdir.
Kursda interaktiv müzakirələr və seminarlar da təşkil edilmişdir. Eləcə də iştirakçıların öz ölkələrinin iqtisadi inkişafını və fərqli göstərilərini əhatə edən təqdimatları dinlənilmişdir.
Gülnarə Fətəliyeva müzakirələrdə fəal iştirak etmiş və kursu müvəffəqiyyətlə bitirdiyinə görə ona sertifikat təqdim edilmişdir.
