Elm və Təhsil Nazirliyinin İqtisadiyyat İnstitutunun "Aqrar sektorun iqtisadi problemləri” şöbəsinin əməkdaşlarının “Azərbaycanda aqrar inkişafda aqroparklar, aqroemal və innovasiya” adlı kollektiv monoqrafiyası nəşr olunub. Kitabın müəllifləri iqtisad üzrə fəlsəfə doktoru (i.f.d.), dosent Famil Rüstəmov, iqtisad elmləri doktoru, dosent Yunus Sadıqov, i.f.d., dosent Rəmzi Abdullayev və böyük elmi işçi Leyla İsayevadır.
İqtisadiyyat İnstitutunun Elmi Şurasının qərarı əsasında çap edilən kitabın elmi redaktoru AMEA-nın müxbir üzvü, professor Şahbaz Muradov, rəyçiləri professorlar Tərbiz Əliyev və İslam İbrahimovdur.
Monoqrafiya 2008-2014-cü illərdə İqtisadiyyat İnstitutunun direktoru olmuş, uzun illər İnstitutun hazırkı “Aqrar sektorun iqtisadi problemləri” şöbəsinin müdiri kimi fəaliyyət göstərmiş, aqrar iqtisadiyyat sahəsinin tanınmış alimi, görkəmli ziyalı, i.e.d., professor İsa Aıyevin əziz xatirəsinə ithaf olunub.
Kitab Azərbaycanda kənd təsərrüfatının dayanıqlı və rəqabətli inkişafı mövzusuna həsr olunub. Əsasən aqroparkların və aqroemal müəssisələrinin rolunu, eləcə də innovativ texnologiyaların tətbiqinin əhəmiyyətini araşdırır. Kitabda aqrar sahədə məhsuldarlığın artırılması, istehsalın səmərəliliyi və rəqabət qabiliyyətinin gücləndirilməsi yolları təhlil olunur. Həmçinin, kənd təsərrüfatı strukturlarının modernləşdirilməsi və innovativ yanaşmaların tətbiqi praktiki nümunələrlə təqdim edilir.
Kitabın elektron variantı - “Azərbaycanda aqrar inkişafda aqroparklar, aqroemal və innovasiya”
