Elm və Təhsil Nazirliyinin İqtisadiyyat İnstitutunun "Aqrar sektorun iqtisadi problemləri” şöbəsinin aparıcı elmi işçisi, iqtisad elmləri doktoru Yunus Sadıqovun müəllifliyi ilə “Aqrar emal sənayesinin iqtisadiyyatı” adlı dərs vəsaiti nəşr olunub.
İqtisadiyyat İnstitutunun Elmi Şurasının qərarı ilə çapa tövsiyə edilən kitabın elmi redaktoru AMEA-nin müxbir üzvü, professor Şahbaz Muradov, rəyçiləri professor İslam İbrahimov, professor Rəsmiyyə Abdullayeva və dosent Aqil Qurbanovdur.
Bu dərs vəsaiti ali məktəblərin tələbə və tədqiqatçılarına aqrar emal sənayesinin iqtisadi mahiyyəti, çağdaş problemləri və inkişaf perspektivləri barədə sistemləşdirilmiş biliklər təqdim edir. Müasir dövrdə kənd təsərrüfatı məhsullarının emalı istehsalla yanaşı, ekoloji, sosial, texnoloji və iqtisadi amilləri birləşdirən kompleks sahədir.
Vəsaitdə sahənin rolu və tarixi inkişafı, ət, süd, un, çörək, şərabçılıq, pambıq, meyvə-tərəvəz və digər əsas emal istiqamətlərinin iqtisadi və texnoloji əsasları izah olunur. Həmçinin davamlı inkişaf və beynəlxalq təcrübə kontekstində Azərbaycanın perspektivlərinə diqqət yetirilir.
Məqsəd tələbələrdə nəzəri biliklərlə yanaşı, analitik və müstəqil düşünmə bacarıqlarını formalaşdırmaqdır. Mövzuların sonunda təqdim olunan anlayışlar, seminar sualları və ədəbiyyat siyahısı tədris prosesini dəstəkləyir.
Vəsait iqtisadiyyat, idarəetmə və kənd təsərrüfatı ixtisaslarında təhsil alan tələbələr və aqrar sahə mütəxəssisləri üçün nəzərdə tutulmuşdur.
