Aprelin 25-də Bakı Biznes Universitetində Ümummilli Lider Heydər Əliyevin anadan olmasının 102-ci ildönümünə həsr olunmuş “Suverenliyin möhkəmləndirilməsində rəqabətqabiliyyətli iqtisadiyyatın inkişafına yeni strateji yanaşmalar” mövzusunda beynəlxalq elmi-praktik konfrans keçirilib.
Tədbiri giriş sözü ilə açan BBU-nun rektoru, professor İbad Abbasov konfransın mövzusunun aktuallığını vurğulayıb və hər bir ölkənin suverenliyinin möhkəmləndirilməsinin və dövlət müstəqilliyinin inkişafının onun iqtisadi gücü ilə birbaşa bağlı olduğunu bildirib.
Konfransın plenar iclasında Milli Məclisin deputatı, akademik Ziyad Səmədzadə “Azərbaycanda real sektorun rəqabət mühiti və onun qanunvericilik bazasının təkmilləşdirilməsi”, Elm və Təhsil Nazirliyinin İqtisadiyyat İnstitutunun baş direktoru, professor Nazim Müzəffərli və elmi işçi Aygün Təhməzli “Ölkənin və onun müəssisələrinin rəqabət qabiliyyəti: uyğunluqlar və uyğunsuzluqlar”, Auditorlar Palatasının sədri, professor Vahid Novruzov isə “Məsuliyyətli rəqabət – rəqabətqabiliyyətliliyə yeni çağırışlar kontekstində” mövzusunda məruzə ilə çıxış ediblər.
Konfrans çərçivəsində xarici ölkələrdən də tanınmış alimlər iştirak ediblər. Türkiyənin Kadır Has Universitetindən professor Özgür Orhanqazi, Polşanın Bıdqoş İqtisad Universitetindən prorektor Maqdalena Berqman, Estoniyanın Tallin Texnologiya Universitetindən Arçil Koçia, Macarıstanın Kənd Təsərrüfatı və Həyat Elmləri Universitetindən İstvan Temesi, Litvanın Utenos Tətbiqi Elmlər Universitetindən Ruta Meiste, Birləşmiş Ərəb Əmirliklərinin Qulf Universitetindən dosent Sabrin Ali Azim, Rumıniyanın Babeş-Bolyai Universitetindən Trayan İonut Luka və Moldovanın İqtisadi Araşdırmalar Akademiyasından dosent Tatiana Qutium iqtisadi rəqabətqabiliyyətlilik, süni intellektin tətbiqi, yaşıl idarəetmə və dayanıqlı inkişaf mövzularında çıxış edərək öz ölkələrinin qabaqcıl təcrübələrini bölüşüblər.
Plenar iclasdan sonra davam etdirilən konfransın bölmə iclaslarında ETN İqtisadiyyat İnstitutunun alim və tədqiqatçıları da iştirak ediblər. Bu sessiyalarda iştirakçılar müxtəlif sahələrdə rəqabət qabiliyyətinin artırılması yolları, innovasiya, rəqəmsallaşma və dayanıqlı inkişafın təmin olunması üzrə yeni iqtisadi modellər ətrafında geniş elmi-praktik fikir mübadiləsi aparıblar.
