"Şamaxı rayonunun özəl investisiyalar üçün cəlbediciliyinin artırılmasına təşviq və dəstək mexanizmlərinin hazırlanması" elmi-tədqiqat layihəsi çərçivəsində hazırlanmış “Şamaxı rayonu: özəl investisiyalar üçün cəlbedicilik” kitabı nəşr olunub. Tədqiqat Azərbaycan Respublikası Şamaxı Rayon İcra Hakimiyyətinin sifarişi əsasında Elm və Təhsil Nazirliyinin İqtisadiyyat İnstitutunda yerinə yetirilmişdir.
Kitabın müəllifləri layihənin tədqiqatçıları, İqtisadiyyat İnstitutunun alimləri - prof. Nazim Müzəffərli (İmanov), prof. Tərbiz Əliyev, dos. Mahir Zeynalov, dos. Famil Rüstəmov, Şakir Alıyev, Ədalət Əzizov, Minarə Ağayeva və Rəmzi Abdullayevdir.
Kitabda regionların sosial-iqtisadi inkişafı üzrə həyata keçirilən iqtisadi islahatlar və sosial-iqtisadi inkişaf göstəriciləri təhlil edilmiş, Şamaxı rayonunun coğrafi-iqtisadi xarakteristikası verilmiş, rayonda sahibkarlığın, sənayenin və kənd təsərrüfatının inkişafı meyilləri, investisiya qoyuluşları, investisiya mühiti və regional investisiya siyasəti təhlil olunmuşdur.
Tədqiqat çərçivəsində hazırlanmış "Şamaxı rayonunun inkişaf konsepsiyası" və onun elmi-metodoloji aspektləri, Şamaxının investisiya cəlbediciliyinin və biznes imkanlarının təşviqi mexanizmləri kitabda əksini tapmışdır. Tədqiqat qrupu tərəfindən sahibkarlar arasında keçirilmiş sorğunun nəticələri təhlil edilmiş, əldə edilən nəticələr praktik tövsiyələrin hazırlanması üçün bazis rolunu oynamışdır.
"Dağlıq Şirvan Regional İnnovativ İnkişaf Mərkəzi"nin (KOB klasterinin) yaradılması təbii balın və dərman bitkilərinin tədarükü və qablaşdırılması, məişət tullantılarının səmərəli idarə edilməsi mexanizmləri, aqroparkların, tədarük məntəqələrinin və soyuducu anbarlar şəbəkəsinin genişləndirilməsi, "Şamaxı Sənaye və Xidmət Məhəlləsi"nin yaradılması, turizmin inkişafı üzrə tövsiyələr hazırlanmışdır.
Tədqiqatın tövsiyələri ölkənin digər regionları üçün də nümunə qismində istifadə edilə, sosial-iqtisadi inkişaf məsələləri üzrə praktik idarəetmə qərarlarının hazırlanmasında, özəl investisiyaların cəlb olunmasında, yeni iş yerlərinin açılmasında, istehsalın şaxələndirilməsində və gəlirlərin artmasında yerli icra hakimiyyəti orqanları üçün faydalı ola bilər (economics.org.az).
