26-30 dekabr 2024-cü il tarixlərində Azərbaycan Respublikası Elm və Təhsil Nazirliyinin İqtisadiyyat İnstitutunun bir qrup əməkdaşı – İnstitutun baş meneceri Şakir Alıyev, İnklüziv sosial inkişaf şöbəsinin müdiri, i.e.d. Rəsmiyyə Abdullayeva və İnnovativ iqtisadiyyat və rəqəmsal transformasiya şöbəsinin müdiri, dosent Allahyar Muradov Türkiyə Respublikasında və Şimali Kipr Türk Respublikasında işgüzar səfərdə olublar.
Dekabrın 26-da elmi heyət Türkiyənin İzmir şəhərində Ege Universitetində, Türk Dünyası Araşdırmalar Mərkəzində olublar. Görüşdə Mərkəzin sədri, professor Nadim Macit, Ege Universitetinin professor-müəllim heyəti iştirak edib. Görüş zamanı Türkdilli dövlətlər arasında elmi əməkdaşlığın gücləndirilməsi, Mərkəzlə gələcək əməkdaşlıq məsələləri ilə bağlı səmərəli müzakirələr aparılıb.
Dekabrın 27-28-də elmi heyət Şimali Kipr Türk Respublikasında bir sıra görüşlər keçirib. Şimali Kipr Türk Respublikasının Mədəniyyət İdarəsinin müdiri Şirin Zəfəryıldızı Zaimağaoğlu ilə görüşdə mədəniyyətin iqtisadiyyatı, turizm mövzuları müzakirə edilib və gələcək əməkdaşlıqla bağlı məsləhətləşmələr aparılıb. Şimali Kipr Türk Respublikasının Bayındırlık və Ulaştırma naziri Erhan Arıklı ilə görüşdə Türkdilli dövlətlər arasında iqtisadi əməkdaşlığın gücləndirilməsi, logistika və s. məsələlər müzakirə olunub.
İqtisadiyyat İnstitutunun əməkdaşları dekabrın 28-də Şimali Kipr Türk Respublikasının Prezidenti Ersin Tatarla görüşüblər.
Elmi heyətin Akdeniz Karpaz Universitində baş katibi Emre Bileklə görüşündə doktorantura təhsili üzrə tələbə mübadiləsi, elmi əməkdaşlıq, birgə tədqiqatların aparılması məsələləri müzakirə edilib.
İstanbul Ticarət Universitetində keçirilən görüşdə Universitetin rektoru, professor Nəcip Şimşək, professor Elçin Aykaç, professor Abdulla Avey və başqaları iştirak ediblər. Görüş zamanı birgə tədqiqatların aparılması, doktorantura təhsili üzrə tələbə mübadiləsi, təlimlərin verilməsi, elmi konfransların keçirilməsi və s. məsələlər müzakirə olunub. İstanbul Ticarət Universiteti ilə ETN İqtisadiyyat İnstitutu arasında ikitərəfli əməkdaşlıq haqqında memorandum imzalanıb (economics.org.az).
