İyunun 12-də Elm və Təhsil Nazirliyinin İqtisadiyyat İnstitutunun "Post-konflikt Ərazilərin Bərpası" Elmi Mərkəzinin bir qrup əməkdaşı - Mərkəzin rəhbəri i.f.d., dos. Azər Səfərov, aparıcı elmi işçilər i.f.d., dosent Təbriz Yadigarov, i.f.d., dos. Rəhimə Nurəliyevə, kiçik elmi işçilər Elmir Mehdiyev və Cavanşir Burhanzadə Laçın şəhərində Prezidentin Laçın rayonunda xüsusi nümayəndəsi Məsim Məmmədovla görüşüblər.
Görüşdə M.Məmmədov yenidən qurulan rayon iqtisadiyyatının perspektiv inkişaf istiqamətləri haqqında məlumat verib, innovativ sahələrin rayon iqtisadiyyatında xüsusi yer almasının strateji məqsəd olduğunu bildirib, tədqiqatçıların suallarını cavablandırıb. Laçın rayonunda istehsalın strukturunun təkmilləşdirilməsinin əhəmiyyətini qeyd edən Azər Səfərov işğaldan azad olunmuş ərazilərdə ərazi-sahə quruluşunun layihələndirilməsi, hər bir inzibati rayon üzrə ixtisaslaşma istiqamətlərinin dəqiqləşdirilməsi, optimal strukturun formalaşdırılması üçün özəl investisiyaların cəlb edilməsi mexanizmlərinin işlənib hazırlanmasının Elmi Mərkəzin əsas tədqiqat istiqamətləri olduğunu qeyd edib.
Daha sonra tədqiqatçılar Laçın rayonunda fəaliyyət göstərən müəssisələrlə yaxından tanış olublar. "Zerti" Sənaye Zonasında "Aydınoğlu" mebel fabriki, Laçın Seleksiya Mərkəzi, Beton Dam Örtükləri Zavodu, Hoçaz Film Studiyası və Laçın İstixanasına baxış keçiriblər. Müəssisə rəhbərliyi tədqiqatçıların müəssisələrin fəaliyyət istiqamətləri, xammal bazası, texniki imkanları, istehsalın həcmi, məhsulun maya dəyəri və s. barədə suallarını cavablandırıb.
Sonda qonaqlar Laçının tarixi Minkənd kəndinə gəliblər, kəndin bərpa konsepsiyası və bu istiqamətdə həyata keçirilən tədbirlərlə bağlı məlumatlar əldə ediblər (economics.org.az).
