AMEA İqtisadiyyat İnstitutunun “Maliyyə, pul-kredit siyasəti” şöbəsinin müdiri, iqtisad üzrə fəlsəfə doktoru, dosent Yaşar Məmmədovun “Audit xidmətinin inkişafı: nəzəri əsasları” kitabı çapdan çıxıb. İnstitutun Elmi Şurasının qərarı ilə nəşr edilən kitabın elmi redaktoru, iqtisad elmləri doktoru (i.e.d.), professor G.Z.Yüzbaşiyeva, rəyçiləri Azərbaycan Respublikası Auditorlar Palatasının sədri, i.e.d., professor V.T.Novruzov, Bakı Dövlət Universitetinin “Dünya iqtisadiyyatı” kafedrasının müdiri, i.e.d., professor H.B.Rüstəmbəyov və Azərbaycan Respublikası Hesablama Palatasının auditoru C.İ.Həsənovdur.
Monoqrafiyada audit konsepsiyasının formalaşması və inkişafı mərhələli şəkildə tədqiq olunur. Auditlə bağlı mövcud nəzəri-konsepsiyalar araşdırılır və onlara olan baxışlara münasibət bildirilir, auditin nəzəriyyəsi və onun əsasları müasir dövr baxımından dəyərləndirilir. Tədqiqat işində ilk dəfə olaraq, audit yükü konsepsiyası və onun əsasları müəyyən edilərək irəli sürülür. Həmçinin, auditin səmərəliliyi konsepsiyası və onun əsasları tədqiq olunmaqla, bu sahənin iqtisadi səmərəliliyi və onun qiymətləndirmə metodikası müəyyən olunur.
Tədqiqatda beynəlxalq təcrübədə audit xidmətinin təşkili və inkişaf xüsusiyyətləri sistemli şəkildə qiymətləndirilir. Əsas diqqət postsovet auditinin inkişaf xüsusiyyətlərinə yönəldilir. Azərbaycanda audit xidmətinin inkişaf səviyyəsi və meyilləri təhlil edilir. Ölkədə makro, sahə və mikro səviyyələrdə audit yükü müəyyən edilməklə, bu xidmət sahəsinin səmərəliliyi qiymətləndirilir. Aparılan tədqiqatlar əsasında Azərbaycan Respublikasında audit xidmətinin əsas inkişaf istiqamətləri müəyyən olunur, bu sahənin inkişafı üçün vacib olan yüksək ixtisaslı və peşəkar auditor kadrlarının hazırlanma əsasları üzrə təkliflər irəli sürülür (economics.com.az).
Kitabın elektron variantı - “Audit xidmətinin inkişafı: nəzəri əsasları”
