İyunun 8-10-da Elm və Təhsil Nazirliyi İqtisadiyyat İnstitutunun bir qrup əməkdaşı “Ağdaş rayonunun strateji sosial-iqtisadi inkişaf istiqamətləri” layihəsi çərçivəsində Ağdaş rayonunda olublar.
Ağdaş Rayon İcra Hakimiyyətində Sosial-iqtisadi və memarlıq-tikinti məsələləri şöbəsinin müdiri Əli Kərimovla keçirilən görüşdə layihə çərçivəsində tədqiqatlar və təşkilati məsələlərlə bağlı geniş müzakirələr aparılıb. Layihənin koordinatoru, İqtisadiyyat İnstitutunun şöbə müdiri, professor Tərbiz Əliyev layihə üzrə elmi tədqiqatlar üzrə görülmüş işlər və nəzərdə tutulan tədbirlər barədə məlumat verib. Müzakirələrdə layihənin tədqiqatçıları - dos. Mahir Zeynalov, dos. Tariyel Qurbanov, i.f.d. Vilayət Ramazanov, habelə rayon İcra Hakimiyyətinin sektor müdiri, aqrar məsələlər üzrə mütəxəssis Xanmusa Əhmədov iştirak ediblər.
İqtisadiyyat İnstitutunun tədqiqatçıları Ağdaşda rayon Statistika İdarəsinin rəisi Elşən Abdullayevlə, Kənd Təsərrüfatı Nazirliyinin Ağdaş Dövlət Aqrar İnkişaf Mərkəzinin direktoru Fərhad Əliyevlə, Yevlax şəhərində isə Azərbaycan Respublikası İqtisadiyyat Nazirliyinin Mərkəzi Aran regional bölməsinin rəisi Sani Məmmədovla görüşüblər.
Bu görüşlərdə “Ağdaş rayonunun strateji sosial-iqtisadi inkişaf istiqamətləri” layihəsi çərçivəsində aparılan tədqiqatlar, konkret layihələr, ideyalar, biznes mühiti, investisiyaların cəlb olunması, yerli sənayenin, kənd təsərrüfatının, xidmət sektorunun inkişafı ilə bağlı yerli şərait və potensial imkanlar ətrafında geniş müzakirələr, fikir mübadiləsi aparılıb.
İqtisadiyyat İnstitutunun tədqiqatçıları Ağdaş rayonunda fəaliyyət göstərən “Türyançay” fermer təsərrüfatının fəaliyyəti ilə yaxından tanış olublar. Yerli müəssisənin mütəxəssisləri təsərrüfatın əsas fəaliyyət istiqamətləri, istehsal və xidmətlər, işçiləri, xammal təminatı, müasir texnologiyalardan istifadə, yerli bazarın başlıca xüsusiyyətləri, şərait və potensial imkanlar, investisiyalar, rəqabət mühiti, satışın təşkili, dövlət dəstəyi və s. barədə məlumat veriblər, habelə qarşılaşdıqları əsas problemlər barədə danışıblar, arzu və istəklərini bildiriblər (economics.org.az).
