Oktyabrın 9-da Azərbaycan Respublikası Elm və Təhsil Nazirliyinin İqtisadiyyat İnstitutunun bir qrup əməkdaşı Naxçıvan Dövlət Universitetində (NDU) olublar.
NDU-nun rektoru Elbrus İsayev iqtisadçı alimləri rəhbərlik etdiyi universitetin fəaliyyəti ilə ətraflı tanış edib, son yeniliklər, tədris prosesi, ali məktəbin nailiyyətləri və əsas hədəfləri barədə danışıb.
Sonra İqtisadiyyat İnstitutunun baş direktoru, prof. Nazim Müzəffərli və şöbə müdiri, i.f.d.. dosent Allahyar Muradov NDU-nun professor-müəllim heyəti ilə görüşüb. Baş direktor rəhbərlik etdiyi İqtisadiyyat İnstitutunun fəaliyyəti, burada aparılan elmi tədqiqatlar və onların əsas nəticələri barədə məlumat verib. Xüsusən də son illərdə dövlət qurumlarının sifarişi əsasında yerinə yetirilmiş tədqiqatlar, onların ölkə üçün əhəmiyyəti, faydaları, çap olunmuş kitablar, iqtisadçı alimlərin ölkə iqtisadiyyatının inkişafı naminə üzərlərinə düşən vəzifələrdən danışıb. Bu sahədə tədqiqat institutları ilə ali təhsil müəssisələrinin faydalı əməkdaşlığının qurulması ətrafında maraqlı müzakirələr aparılıb.(economics.org.az).
