Məlumat üçün bildiririk ki, Azərbaycan Respublikasının Elm və Təhsil Nazirliyi və Böyük Britaniyanın nüfuzlu Kembric Universitetinin "Cambridge University Press" (CUP) nəşriyyatı arasında əldə edilmiş razılığa əsasən, Azərbaycanda fəaliyyət göstərən 140 elmi və ali təhsil müəssisəsinin müəllifləri üçün mühüm nəşr imkanları yaradılmışdır.
Razılaşmaya əsasən, müəlliflər 2026-cı il də daxil olmaqla 3 il müddətində CUP tərəfindən nəşr edilən, "Web of Science" və "Scopus" kimi qlobal elmmetrik bazalarda indekslənən 423 "Open Access" jurnalda məqalələrini açıq əlyetərli (Open Access) formatda ödənişsiz nəşr etdirə bilərlər.
Bu müqavilə çərçivəsində müəlliflər məqalə emalı haqqından (Article Processing Charge - APC) azad edilirlər. Müqavilənin şərtlərinə əsasən yalnız korrespondent müəllifin Azərbaycandan olması tələb olunur və digər müəlliflər xarici ölkələrdən olduqda da CUP tərəfindən hər hansı ödəniş nəzərdə tutulmur. Eyni zamanda, bu razılaşma əsasında ölkənin 140 elmi və ali təhsil müəssisəsinə sözügedən 423 jurnaldan müddətsiz oxuma imkanı təqdim edilir. Müəlliflər təqdim olunan imkanlardan yararlanmaq üçün "Cambridge Core" platformasına daxil olaraq müvafiq jurnalları seçə və nəşr prosedurları ilə tanış ola bilərlər.
Platformaya aşağıdakı keçid vasitəsilə daxil olmaq mümkündür: (https://www.cambridge.org/core/journals)
Əlavə suallar yarandığı təqdirdə science@eatda.edu.az elektron poçt ünvanına müraciət edə bilərsiniz.
